CEO gimandoan pag-imbentaryo sa tanang open drainage canals

KUSGANONG gimandoan ni Konsehal John Michael Seno, chairman sa komite sa public works, ang City Engineer’s Office (CEO) pagtumbok ug pagpahigayon og imbentaryo sa tanang open drainage canal dinhi sa syudad.

Kini agig aksyon sa special report ni Konsehal Yvy Emano nga nagsugyot nga matakloban ang mga open drainage canals sa kadalanan. Sa tigom sa komite niadtong Martes, si Emano mipasabot nga adunay iyang namatikdan nga mga kanal nga walay taklob ilabina diha sa Camaman-an nga pelegro kaayo sa katawhan.

Niini, ang representante sa Department of Public Works and Highways (DPHW) -10 miingon nga kun adunay mga reklamo ilabina kun kini mga national roads mahimo nga idangop sa ilang buhatan aron maaksyonan.

Hinuon, si Seno nanawagan nga unta ang maong matang sa reklamo mahatagan sa mga labing daling aksyon aron maseguro ang kaluwasan ug kapasiguroan sa katawhan.

Ang komite naghatag sa CEO og usa ka bulan nga tagal sa pagsumete sa ilang imbentaryo sa tanang open canals aron mapangitaan og solosyon.

Ang tigom sa komite gitambungan usab ni Konsehal Aga Suan.