Centex ECCD mapatuman na sa CDO

Gipaabot nga mapalapdan pa ang natad sa edukasyon sa kabataan sa napulo ka mga barangay sa dakbayan. Kini human ang konseho sa syudad ubos ni Bise Mayor Bebot Rodriguez mipalabang sa ordinansa nga naghatag og katungod ni Mayor Klarex Uy pagpirma sa Memorandum of Agreement (MoA) tali sa kagamhanan sa dakbayan ug Ayala Foundation Inc. (AFI) alang sa pagpatuman sa Centex Early Childhood Care and Development (ECCD).

Si Konsehal Girlie Balaba, chairman sa komite sa social services, mibutyag nga ang maong kasabutan naglangkob sa usa ka tuig nga teacher training and mentoring sa mga day care teachers aron mahitsas sa gikinahanglang kahibalo ang mga magtutudlo dinha sa mga daycare centers.

Sa programa, ang dakbayan migahin og P1.2 milyones alang sa training sa 20 ka mga magtutudlo o’ childcare workers sa napulo ka mga barangay alang sa tuig tingtungha 2023-2024. Dako ang paglaum ni Balaba nga kun makompleto ang programa, daghang kabataan ang maabagan dinha sa ilang pagkakat-on samtang linghod pa ang mga panuigon.

Ang ordinansa nga gipalabang sa konseho alang sa maong katuyuan gipaluyuhan usab sa komite sa panalapi ni Konsehal Alam Lim ug komite sa pamalaod ni Konsehal Ian Mark Nacaya.