CDO nangusog masolosyonan online sexual exploitation – Girlie

ANG kagamhanan sa dakbayan sa Cagayan de Oro walay puas nga nangita sa mga pamaagi pagtubag sa problema sa online sexual exploitation.

Mao kini ang gibarugan ni konsehal Girlie Balaba atol sa sesyon sa konseho niadtong Lunes nga gidumalani bise mayor Kikang Uy human si konsehal Edna Dahino mitaho nga naila ang dakbayan isip hotspot sa online sexual exploitation of children (OSEC) sa rehiyon 10.

Matod ni Balaba nga dili makiangayon sa mga ahensya sa local nga kagamhanan ang giingong lisod nga koordinasyon tali sa dakbayan ug Regional Anti-Cybercrime Unit 10 tungod kay nagpadayon ang paglihok ug pagpangita sa pamaagi nga masolosyonan ang mga insidente sa online sexual abuse.

Kun nagkinahanglan og pundo aron mapatuman ang pipila ka mga programa pagpakgang sa maong krimen, dili magpanuko ang konseho ilabina ang mga komiteba sa women and family relations ni konsehal Dahino, edukasyon ni konsehal Suzette Magtajas-Daba ug ang social services alang sa pagtuki ug pagtuon aron mapalapdan pa ang kampanya kontra online sexual exploitation, pamahayag ni konsehal Girlie Balaba.