CDO nangusog maprotektahan Macahambus Cave

GIHINGUSGAN karon sa konseho sa dakbayan ubos ni Bise Mayor Bebot Rodriguez nga maprotektahan ang mga langub sa syudad ilabina ang Macahambus Cave.

Kini human ang konseho sa sesyon kagahapon mipalabang sa ordinansa nga naghatag og katungod ni Mayor Klarex Uy pagpirma sa Memorandum of Agreement (MoA) tali sa rehiyonal nga buhatan sa Department of Environment and Natural Resources (DENR-10).

Ang maong MoA naglangkob sa kolaborasyon sa dakbayan ug DENR dinha sa pagmugna sa Caves and Cave Resources Conservation, Management and Protection (CCRMP) ilabina ang Macahambus Cave ug uban pang mga langub nga nasulod sa teritoryo sa Cagayan de Oro.

Sa maong MoA, ang DENR gitahasan sa pag-regulate sa pagkolekta ug pagtangtang sa mga cave resources sa Class II caves sa dili pa ang suitable clearance gikan sa Protected Areas and Wildlife Bureau (PAWB) LGU ug National Museum; maghimo og trainings ug susamang mga serbisyo ngadto sa lokal nga kagamhanan aron maseguro ang epektibong pagproteher, pagpalambo ug pagdumala sa mga langub.

Samtang ang dakbayan gitasahan sa pag-provide sa gikinahanglang manpower ug financial resources alang sa katumanan sa programa; pagsukip sa cave management plan sa land use, development, investment ug revenue plans sa syudad ug pagdasig sa pribadong sektor dinha sa pag-abag sa tukmang pagdumala sa mga langub.

Ang ordinansa nga gipalabang sa konseho alang sa maong katuyuan gipaluyohan sa komite sa environment ni Konsehal Roger Abaday ug komite sa pamalaod ni Konsehal Ian Mark Nacaya.