CDO nagtanyag og Med, Law scholarships

KUSGANONG nagpahibalo si Konsehal Suzette Magtajas-Daba, chairman sa komite sa edukasyon, nga ang buhatan sa CDO City Scholarships nagsugod na og dawat sa online applications alang sa mga kwalipikadong mamahimong Law ug Medical scholars sa dakbayan alang sa tuig 2023-2024.

Ang programa gitumong sa pagtubag sa kakulangon sa panginahanglan sa medical o law nga propesyon sa syudad ug paghatag ug kaugalingong personahe sa mga ospital nga gipadagan sa kagamhanan ug paghatag og legal assistance isip partner pagtunol og serbisyo ngadto sa mga kabus nga residente sa dakbayan.

Kini nga programa alang sa tanang post graduates kansang mga ginikanan walay kapasidad nga magpatungha sa ilang mga anak sa dugang 5 ka tuig nga degree susama sa medical ug abogasiya nga kurso.

Niini, dako ang pasalamat ni Konsehal Daba sa administrasyon ni Mayor Klarex Uy sa suporta ug pagpalapad sa programang Iskolar sa Dakbayan ug siya miaghat sa tanang mga kwalipikadong tinun-an nga magpahimulos niining talagsaon ug dalaygon nga kahigayonan nga gitanyag sa kagamhanan sa dakbayan sa Cagayan de Oro.

Alang sa gustong mo-apply, mag-fill up lang sa online agi sa https://bit.ly/MedLawApplication2023 ug alang sa dugang impormasyon, mamahimong motawag sa 09298190819 o’ mobisita sa CDO City Scholarships Office FB page. Ang pagdawat sa aplikasyon taman lamang sa Mayo 20, 2023.