CDO nagdawat na sa aplikasyon alang sa mga iskolar sa dakbayan

SI Konsehal Suzette Magtajas-Daba, chairman sa Komite sa Edukasyon, hugot nga mipahibalo nga nagsugod niadtong Pebrero 17 ug matapos sa Marso 11, ning tuig ang pagdawat sa aplikasyon alang sa 2022 College Scholarships Program sa dakbayan.

Ang maong programa bukas alang niadtong mga incoming first year college students sa tuig tingtungha 2022-2023, gradwado sa senior high school sa pribado o pampublikong tunghaan, lumad o residente sa dakbayan, wala pa nakasugod og tungha sa kolehiyo ug dili molampas sa P300 mil ang tinuig nga kinitaan sa pamilya.

Alang sa unang proseso mag-apply online niini nga link: bit.ly/ISDAApplication2022 sugod sa alas 8:00 sa buntag hangtod sa alas 5:00 sa hapon.

Matod ni Konsehal Suzette nga sa kasamtangan aduna nay 7000 ka iskolar ang dakbayan ug ang kagamhanan migahin og pundo balor P250 milyones alang sa tuig 2022.

Dako kini nga kahigayonan sa tanang kabataan nga makab-ot ang ilang gidamgong kurso alang sa kaarangan sa kinabuhi kun mapili silang benepisaryo sa maong programa.

Dugang sa konsehal nga angayang makapahimulos sa programa kadtong mga kabus ilabina niadtong adunay talento ug malantip nga salabutan, interesado nga makahuman sa ilang pagtuon sa kolehiyo apan walay sarang ug kapasidad ang mga ginikanan nga makapatungha sa mga anak.

Gihangyo ang tanang aplikante nga motambong sa pagahimoong online applicant’s assembly sa umaabot Marso 19, 2022 pinaagi sa FB page Cdo City Scholarships Office.

“Be part of the growing number of CdO-Isda (Iskolar sa Dakbayan)”, pahimusli ang talagsaong programa sa gobyerno nga magdala kaninyo sa mahayag nga kaugmaon, dugang pamahayag ni konsehal Suzette.

Niini, hugot nga giawhag a ng mga interesadong tinun-an sa pagbisita sa FB page CdO City Scholarships Office o mamahimong motawag sa numero 09298190819 alang sa dugang impormasyon.