CdO mananaog sa Gawad Edukampyon for Local Governance 2023

SI Konsehal Suzette Magtajas-Daba, Chairman sa Komite sa Edukasyon sa Konseho, hugot nga nagpasalamat sa administrasyon ni Mayor Klarex Uy sa walay puas nga pagsuporta sa mga programa sa tinguha nga ang tanang kabataan makaangkon og de kalidad nga edukasyon.

Kini human nahimong mananaog ang kagamhanan sa dakbayan sa Gawad Edukampyon for Local Governance 2023 - Highly Urbanized City Category.

Matod sa konsehal nga kini ang labing unang higayon nga ang syudad nakasungkit sa tulo ka pasidungog nga gilangkoban sa Gawad Edukampyon for Early Childhood Care and Development, Gawad Edukampyon for Capacity Development, ug Gawad Edukampyon for Learning Continuity Plan.

Naangkon ang maong kadungganan tungod sa nagkadaiyang mga programa sa kagamhanan uban sa pagtambayayong sa Local School Board, Teach for the Philippines ug Department of Education-Division of Cagayan de Oro sa tinguha nga mapalambo ang kahibalo sa kabataan diha sa pagbasa.

Gipasalamatan usab ni Konsehal Daba ang Gawad Edukampyon Executive Committee nga gilangkoban sa Department of Education (DepEd), Department of the Interior and Local Government (DILG), ECCD Council ug Rex Education sa pagpasiugda sa maong kompetisyon.

Ang maong pasidungog gidawat nila ni Konsehal Suzette Magtajas-Daba ug Konsehal Edgar Cabanlas, sa ngalan ni Mayor Klarex Uy atol sa awarding ceremony niadtong Mayo 4, 2024 didto sa Novotel, Quezon City.