CDO isip Smart City sa MisOr gisuportahan

Hugot nga gisuportahan sa konseho sa syudad ubos ni Bise Mayor Bebot Rodriguez ang pagpatuman sa mga programa nga mag-develop sa dakbayan sa Cagayan de Oro isip Smart City sa Misamis Oriental.

Sa sesyon sa konseho niadtong Lunes, nga gidumala ni Presiding Officer Protempore Konsehal Edgar Cabanlas, hiniusang gipalabang ang ordinansa nga naghatag og katungod ni Mayor Klarex Uy paglagda sa Memorandum of Understanding (MoU) tali sa Department of Science and Technology –Regional 10 ug University of Science and Technology of the Philippines (USTP).

Ang maong kasabutan naglatid sa kolaborasyon ug panagtambayayong sa DOSt-10, USTP ug dakbayan sa Cagayan de Oro alang sa pagpatuman sa proyektong gipangulohan og “Support to the Development of Cagayan de Oro as a Smart City in the Province of Misamis Oriental”.

Ubos sa MoU, ang DOST-10 maoy maghatag sa gikinahanglang pundo ug technical support dinha sa pagsusi nga andam na ang CDO nga mamahimong Smart City, paghikay sa Smart City roadmap ug pag-ila sa mga proyektong nga hatagan sa unang pagtagad nunot sa konsepto sa Smart City ug pagpatuman sa mga matumbok nga proyekto.

Samtang ang dakbayan makigtambayayong sa DOST-10 ug uban pang stakeholders sa pagmugna sa plano ug pagpatuman sa Smart City project, paghatag sa gikinahanglang data, impormasyon ug mekanismo aron mahimo ang desinyo, kalamboan ug pagpatuman sa mga proyekto ug maghatag sa paatbang pundo alang sa pipila ka mga proyekto subay sa pagalagdaang Memorandum of Agreement ug mopalabang sa resolosyon aron mapadali ang pagpatuman ug kalampusan sa proyekto.

Sa laing bahin, ang USTP makiglambigit pinaagi sa pagpahigayon og research ug development projects ug pagpa-ambit sa kahibalo dinha sa ipahigayong mga kalihokan ug capacity building.

Si Bise Mayor Bebot Rodriguez, kinsa mihatag sa iyang rekomendasyon sa pagpalabang sa ordinansa, malaumon nga makatabang sa pag-angkon sa dugang kaarangan sa dakbayan ang pagsuporta sa mga lakang nga magdala sa kalamboan ilabina sa natad sa digital technology dinha sa pagkonektar, pagproteher ug pagpalambo sa kinabuhi sa katawhan.