CDO, Galing Pook awardee sa natad sa panglawas

DAKO ang pasalamat sa konseho sa syudad ubos ni Bise Mayor Kikang Uy sa administrasyon ni Mayor Oscar Moreno, sa tanang Kagay-anon ug mga frontliners kinsa nakigbisog dinha sa tinguha nga mapakgang ang pagkaylap sa Covid-19 dinhi sa syudad.

Timaan sa maong pakigbisog ang pagkapili sa dakbayan isip usa sa Top Ten Outstanding Galing Pook awardee sa tuig 2021 nga gitunol niadtong Oktubre 20, 2021 sa Galing Pook Foundation.

Sa sesyon sa konseho niadtong Lunes, si Konsehal Malou Gaane, chairman sa komite sa panglawas, mipahibalo nga ang entry sa dakbayan nga “Health is Worth Fighting For: Cagayan de Oro Health Journey” maoy napiling Most Innovative Local Governance Program sa natad sa panglawas.

Ang maong entry nagpakita sa pagtambayayong sa katawhan ug sa gobyerno sa dakbayan aron maangkon ang hingpit nga kalampusan sa gitinguhang mga programa alang sa panglawas sa matag Kagay-anon.

Niini, gipakita ang gipatumang lakang sa dakbayan aron mapanumbalik ang tukmang health care system lakip na ang gitunol nga serbisyo sa JR Borja General Hospital, health centers sa kabaranggayan ingon man ang financial risk protection, pagtukod sa Cagayan de Oro Emerging and Re-emerging Infectious Disease Facility ug ang bag-ong duha ka hospitals dinha sa duha ka distrito sa syudad.

Kini ang ikatulong panahon nga napili ang dakbayan isip Top LGU sa Galing Pook ug una sa health innovations.

Uban sa panagtambayayong sa ika-18 ug 19 nga konseho sa dakbayan sa Cagayan de Oro pinaagi ni Bise Mayor Kikang Uy ug sa administrasyon ni Mayor Oscar Moreno ug sa tanang Kagay-anon, atong naangkon ang maong kalampusan, pamahayag ni konsehal Malou Gaane.