CdeO, mosalmot sa Malinis at Masaganang Karagatan contest

GIHIKAY na sa dakbayan sa Cagayan de Oro ang mga gikinahanglang dokumento nga isumete sa pagsalmot sa Malinis at Masaganang Karagatan (MKK) contest nga gilusad sa Departamento sa Agrikultura (DA) ubos sa Bureau of Fisheries and Aquatic Resources (BFAR).

Kini ang kasayuran nga nadawat ni Bise Mayor Kikang Uy human giluwatan sa administrador sa dakbayan ang Memorandum No. 2067-2021 nga nagmando sa pipila ka departamento sa City Hall pag-abag sa buhatan sa City Agriculture (CAO) aron makompleto ang gikinahanglang rekisitos sa pagsalmot sa maong indigay.

Nasayran nga ang maong pa-contest mag-ila sa labing maligdong nga coastal community sa tibouk nasud diin ang mapiling grand winner makadawat og balor P30 milyones nga pundo alang sa livelihood programs sa mga coastal community samtang ang second place makadawat og balor P18 milyones ug P 10 milyones usab alang sa third place.

Ang pagpili sa mananaug magbasi sa hingpit nga pagpatuman sa mga balaod ug patakaran pagproteher sa kadagatan sama sa no illegal fishing, pagtamod sa closed fishing season, pagtukod sa mga marine protected areas, limpyong coastal waters gikan sa mga basura, domestic man o’ industrial ug epektibong mangrove protection and rehabilitation program.

Malaumon si Bise Mayor Kikang Uy nga magmalampuson ang dakbayan tungod kay gipatuman man sa hingpit ang mga programa ug proyekto dinha sa pagproteher ug pagpalambo sa kadagatan sa dakbayan.