CDC dihas Brgy. Puntod natunol na- Konsehal Suzette

DUGANG kalamboan sa natad sa edukasyon ang matagamtaman sa mga kabataan dihas Barangay Puntod ning dakbayan.

Kini human gitunol sa syudad sa miaging semana ang modernong Child Development Center (CDC) nga adunay kumpletong facilidad nga mobalor og P1.250 Milyones nga nahimutang diha sa Block 3, District 6, Barangay Puntod, ning syudad.

Si Konsehal Suzette Magtajas-Daba, chairman sa komite sa Edukasyon mipasalamat sa kagamhanan nga taliwala sa nasinating pandemya nagpadayon ang panglantaw alang sa kaarangan sa kabataan.

Matod sa konsehal nga dugay na kini nga gipangandoy ni Child Development Teacher Jovalyn Auguis ug sa mga ginikanan sa dapit nga makabaton sa maong center ang ilang barangay.

Nahatagan og katumanan ang pangandoy, aduna nay permanenteng lugar ug insaktong kagamitan nga matunol sa mga bata, pamahayag ni Konsehal Suzette.

Niini, malaumon ang konsehal nga dako og ikatabang ang maong edipisyo ug pinaagi niini makaaghat ang kabataan sa pagtungha tungod kay matunol naman ang de kalidad nga edukasyon taliwala sa kalinghod sa ilang pangedaron.