Calizo uyon sa hangyong mahimong no parking zone ang Inabanga St., Bulua

HINIUSANG nauyonan sa komite sa public utilities, energy and transportation ni Konsehal Romeo Calizo ang resolosyon nga giduso sa konseho sa barangay Bulua nga nagdeklara nga “No Parking” sa tanang sakyanan ang Inabanga Street, Zone-1, Bulua.

Kini human hugot nga girekomendar ni Engr. Nonito Oclarit, acting department head sa Roads and Traffic Administration (RTA), atol sa milabayng tigom sa komite nga angayang mapatuman sa dapit ang “no parking” aron magamit sa publiko ang maong dalan ilabina panahon sa emerhensya.

Gawas pa nga kini usab ang hangyo sa mga residente sa dapit.

Niini, si Calizo mibutyag nga bisan gamay lang ang dalan sa dapit ug halos mapuno sa mga sakyanan nga nag-parking nga unta dili angayan tungod kay nakaper-huwisyo sa mga molopyo ug sa publiko, sumpay sa konsehal.

Nunot niini, hiniusang gipaboran sa komite ang maong hangyo ug giduso ngadto sa komite sa pamalaod ug reglamento aron masukip sa mga pagahisgutan sa umaabot sesyon sa konseho. (SP/MLRapanot)