Calizo, Salcedo misuporta sa hangyo sa CUMC

MALAUMON si Konsehal Enrico Salcedo nga matugutan ang hangyo sa Capitol University Medical Center nga temporaryong makaparada ang ilang mga kliyente sa gawas nga bahin sa ospital samtang nagpadayon ang gitrabaho nga bag-ong edipisyo.

Kini human ang Roads and Traffic Administration, sa tigom sa komite sa Roads and Traffic Management ni Konsehal Romeo Calizo kagahapong adlawa, misanong sa maong hangyo sa rason nga temporaryo lang kini.

Hinuon, gipasabot ni Engr. Nonito Oclarit sa RTA nga makaturunganon ang maong hangyo apan siya misugyot nga angayan nga mananghid usab sa Department of Public Works and Highways (DPWH-10) tungod ka yang national highway ubos sa ilang jurisdiction.

Gani, iyang gibutyag nga kaniadto pa sige magsulat ang ahensya sa ilang buhatan nga dili gayud paparadahan ang maong dapit kay gidili gayud sa balaod.

Sa iyang bahin, si Salcedo mibutyag nga nakita niya nga apiki kaayo ang parking area sa ospital ug louy kaayo ang mga kliyente nga galisod pagpangita og kaparadahan sa ilang mga salakyan.

Niini, ang komite mipalabang sa resolusyon nga naghangyo sa mga hintungdang ahensya sa gobyerno nga matugutan sa kasamtangan ang maong hangyo sa CUMC.