Calizo naninguha matubag hangyo sa bao-bao operators, drivers -TWG gimugna

Atong paninguhaon nga maka-operate ang mga bao-bao dinha sa kadalanan nga walay balaod nga masupak.

Mao kini ang pamahayag ni Konsehal Romeo Calizo, chairman sa komite sa public utilities, atol sa milabayng tigom human gituki ang hangyo sa pipila ka kapunungan sa mga tri-cab operators ug drivers nga matugutang makapamasahero.

Sa tigom, gipasabot sa representante sa Land Transportation Office (LTO) nga wala gayud gitugot sa balaod nga makadagan ug mamasahero sa highway ang mga tri-cab o’ three-wheeled vehicles (bao-bao).

Niini, si Calizo midugang nga lisod alang sa mga awtoridad nga dili ipatuman ang balaod tungod kay alang man kini sa kaayuhan sa katawhan.

Alayon niini, gimugna sa komite ang Technical Working Group (TWG) nga pangunahan ni Konsehal Aga Suan aron magtuon sa maong hangyo alang sa interest sa katawhan sa mga lugar nga giserbisyohan sa mga bao-bao.

Gitumbok nga maglangkob sa TWG ang City Administrator’s Office, City Legal Office, Roads and Traffic Administration, LTFRB, LTO ug uban pang mga hintungdang ahensya sa gobyerno.