Calizo nangusog masulbad mulosa mga sumasakay sa brgy Lumbia

GITINGUHA sa komite sa public utilities, energy and transportation ni Konsehal Romeo Calizo nga matubag ug masolosyonan ang hangyo sa katawhan sa Barangay Lumbia nga madugtongan ang ruta sa mga van nga namasahero sa Cogon Market paingon sa Gran Europa hangtod sa Upper Palalan ug Lumbia public market.

Hiniusang nauyonan sa komite uban sa Lumbia Public Transport Corporation pinaagi sa ilang presidente nga si Buenaventura Arceo, Land Transportation Franchising Regulatory Board (LTFRB), Engr. Nonito Oclarit sa Roads and Traffic Administration (RTA) ug konseho sa barangay Lumbia nga ang transport group na lang maoy mopauyon aron maserbisyohan ang mga sumasakay lakip na ang lugway sa oras sa pagpamasahero ingon man ang pagdugang og pito ka sakyanan aron maserbisyohan ang mga sumasakay.

Niini, malaumon si Calizo nga matubag sa kasamtangan ang mulo sa mga pasahero sa barangay Lumbia samtang nagpaabot ang komite sa hingpit nga pagpatuman sa Local Public Transport Route Plan (LPTRP).