Calizo nangusog maresolbar problema sa mga transport cooperative

GIHINGUSGAN ni Konsehal Romeo Calizo, Chairman sa Komite sa Public Utilities nga maplastar og maresolbar ang problema sa pipila ka mga transport cooperative dinhi sa syudad.

Kini ang unod sa special report sa konsehal sa sesyon sa konseho niadtong Lunes nga gidumala ni Konsehal George Goking.

Sumala sa konsehal nga adunay na dawat nga sulat reklamo ang buhatan sa Bise Mayor gikan sa mga sakop sa Golden Eco Friendly Transport Cooperative nga nagpaabot sa ilang reklamo mahitungod sa dili pagsinabtanay sa mga membro, renewal sa ilang mga unit registration nga nagkinahanglan sa tukmang pagpasabot ug uban pang  panagbangi nga kinahanglan maresolbar.

Mipasabot usab ang konsehal nga mahinungdanon kaayo ang papel sa mga transport cooperative sa transport system sa syudad maong angayan usab nga malantaw kon giunsa nila pagdumala ang ilang tagsa-tagsa ka kooperatiba.

Niini, gisugyot ni Konsehal Calizo nga mahisgutan kini sa iyang komite uban sa Komite sa Cooperative ni Konsehal Kenneth Sacala aron hiniusang matuki ug maresolba ang problema nga gisagubang sa pipila ka transport cooperative.