Calizo nangusog mamugna PU Coordinating Board

Hiniusang gisagop sa komite sa Public Utilities, Energy and Transportation ni Konsehal Romeo Calizo ang pagmugna sa Public Utilities Coordinating Board aron masunod sa mga kontraktor ang insaktong proceso sa dili pa sila magsugod pagtrabaho sa mga proyekto ug malikayan ang disgrasya.

Kini human ang kadagkuan sa Cagayan de Oro Electric Power and Light Company (CEPALCO) mipadangat sa ilang hangyo nga unta mapatuman ang halapad nga kampanya sa RA 11361 kun Anti-Obstruction of Power Line Act of 2019.

Sa maong balaod, kinahanglang mokuha ang kontraktor og clearance gikan sa CEPALCO alang sa kapasegurohan ug malikayan ang susamang panghitabo niadtong milabayng bulan diha sa Upper Puerto diin natumba ang poste sa CEPALCO sa gihimong pagkalot nga mikalas sa kinabuhi sa usa ka trabahante.

Dako ang pagtuo ni Calizo nga kun adunay insaktong koordinasyon sa pag-implementar sa mga proyekto malikayan ang disgrasya ilabina kun mapatuman sa hingpit ang balaod. Ang maong hunta gipaabot langkoban sa mga representante gikan sa buhatan sa Department of Public Work and Highways (DPWH), Department of Labor and Employment (DOLE), CEPALCO ug uban pang hingtundang ahensya sa gobyerno lokal ug national.