Calizo nangusog makabaton og birth certificate ang 30 ka estudyante

GIHINGUSGAN ni Konsehal Romeo Calizo, chairman sa Komite sa public safety nga matabangan ang  dili mominus sa 30  ka estudyante sa Bulua National High School -Patag Annex  ug uban pa gikan sa  Camp Evangelista Elementary School nga  makabaton  og birth certificate.

Sa sesyon sa konseho niadtong Lunes nga gidumala ni Bise Mayor Bebot Rodriguez, si Calizo mitaho  nga nakadawat siyag sulat  gikan sa chairman  sa komite sa edukasyon sa Barangay Patag nga nagpahibalo  nga adunay  mga  estudyante nga giingong  hangtod karon  nagtungha  nga walay mga birth certificate.

Gani, matod ni Calizo nga nagpahigayon  dayon siya og pakisayod sa  buhatan sa Local Registrar ingon man sa Philippine  Statistics Authority (PSA) apan dili sayon  ang pag-secure niini labina kon late registration.

Gipasabot  ni Calizo nga  buot niya nga maduso kini sa hintungdang komite  aron  matabangan  ang maong mga estudyante  nga  makabaton  og  birth certificate tungod kay importante kini  nga dokumento labina kon mutongtung na sila sa kolehiyo ug sa uban pang mahinungdanong katuyoan.

Giduso ni Bise Mayor Rodriguez ang special report ni Calizo ngadto sa komite sa edukasyon  alang sa dugang askyon ug rekomendasyon. (JRGalano/SP)