Calizo nangusog makabaton kaugalingong forensic office ang dakbayan

PADAYON karon nga gipangitaan og paagi sa Komite  sa Public Order ubos ni Konsehal Romeo Calizo nga makabaton sa kaugalingong forensic office ang  Cagayan de Oro City Police Office (COCPO).

Sa tigom sa Komite niadtong Biernes  sa Conference Hall sa Konseho  nga gitambungan sa  representante sa  National Bureau of Investigation (NBI), School of Criminology and Criminal Justice sa Cagayan de Oro College, City Department of Interior and Local Government (DILG), City Police Director sa COCPO ug uban pang dinapit, gipasabot  ni  Calizo ang kamahinungdanon sa maong buhatan diha sa kasulbaran sa mga  kaso  apan subo lang nga imbis ang dakbayan usa ka highly urbanized city, kini walay kaugalingong forensic unit.

Hinoon, gipasabot  sa kapulisan nga sa pagkakaron, aduna silay mga personahe  nga mahimong makadumala niini apan ang problema wala silay kaugalingong kagamitan ug edipisyo alang sa usa ka forensic office nga gikinahanglan sa ilang operasyon.

Segun usab sa ilang presentasyon, mokabat sa P130,738,595 ang balor sa ilang gisugyot nga standard City Forensic Office nga diin apil na niini ang kagamitan ug edipisyo. Hinoon aduna silay gipaila nga mga basic lang na kagamitan aron inisyal sila nga maka-operate.

Matod sa komite nga mahimo silang makatukod sa temporaryong buhatan sa roof deck sa City Hall tungod kay mao palang kini ang nakita nga bakante.

Subay niini, ang komite gipaabot mopatawag og laing tigom aron ipadayon ang paghisgot niini uban sa Local Finance Committee.