Calizo nahingawa sa obserbasyon sa AB Psychology students sa XU

GIKAHINGAWA ni Konsehal Romeo Calizo, Chairman sa Komite sa Public Order, ang obserbasyon sa gihimong pagtuon sa AB Psychology students sa Xavier University nga may kalabutan sa livelihood psychology ug investment psychology nga nakatutok sa mangingisda dihas Barangay Bonbon.

Kini ang unod sa special report sa konsehal atol sa sesyon sa konseho miaging Lunes nga gidumala ni Bise Mayor Bebot Rodgriguez.

Sumala  ni Calizo nga sa maong pagtuon naobserbahan nga labing malampuson ang dagkong investor kaysa mga local nga mangingisda nga giingong gakabintahaan diha sa pagpangisda tungod kay hangtod karon, ang kinaraan nga pamaagi sa pagpangisda lang gihapon ang  ilang gigamit.

Giingon nga kon ang  mangingisda managat sa kalawran sa gilay-ong 10 kilometro mahimong ulahi na gyud sila nga makakuha og dagkong isda mao nga ang dagkong imbestor kanunay ang mahatagan sa prioridad.

Gipasabot ni Calizo nga naobserbahan usab sa mga estudyante pinaagi sa ilang pagtuon nga ang lokal nga kagamhanan walay konkretong programa nga mapalambo ang panginabuhian sa mga mangingisda gikan sa method, teknolohohiya ug kanunay nga maapsan sa mga panghitabo mao nga igo lang gayod sila sa pagpakabuhi.

Giduso ni Bise Mayor Rodriguez ang taho ni Calizo ngadto sa Komite sa Fisheries ni Konsehal Christian Rustico Achas alang sa tukmang pagtuon ug aksyon.