Calizo nahingawa sa kausaban sa diversion road plan dihas Patag

DAKO ang kahingawa ni Konsehal Romeo Calizo sa dangatan sa mga residente sa barangay Patag nga maapektohan sa kausaban nga gipatuman dinha sa implementasyon sa Talakag-Cagayan de Oro Diversion Road Project sa DPWH.

Mao kini ang gipadayag sa konsehal sa sesyon sa Konseho niadtong Lunes nga gidumala ni Bise Mayor Kikang Uy human iyang nadawat ang mulo sa mga maapektohang molopyo sa barangay.

Iyang gipasabot nga ang proyekto sa diversion road molatas gikan sa national highway agi sa barangay Carmen, Patag, Bulua ug lahos sa national highway sa westeng bahin sa syudad.

Matod niya nga ang orihinal nga ruta sa maong gisugyot nga dalan mag-agi sa kanhi landfill dinha sa Upper Dagong, Carmen paingon sa Diamond Heights Subd, kilid sa koral sa Camp Evangelista paingon sa Bulua ug sa national highway.

Apan sa katingala sa katawhan, giusab ang maong ruta ug sa kasamtangan ang pagtrabaho sa proyekto moagi na sa Zones 3, 4, 8 ug 11 sa Patag gumikan matod pa sa security reasons nga gidason sa 4th ID, Philippine Army.

Nahimong sakripisyo ang kaayuhan sa mga residente sa Patag aron masolosyonan ang giingong rason sa 4th ID. Luoy ang taga-Patag nga mawad-an sa ilang mga pinuy-anan tungod sa maong proyekto, dugang ni Calizo.

Niini, si Bise Mayor Kikang Uy miduso sa taho ni Calizo ngadto sa Komite sa Subdivision and Landed Estate ni Konsehal Edgar Cabanlas alang sa pagtuki ug pagpahigayon og konsultasyon tali sa mga molopyo sa dapit, DPWH ug kadagkoan sa 4ID, Philippine Army.