Calizo nahingawa sa kahimtang sa mga K9 Dogs

Hugot nga gikahingawa ni  Konsehal Romeo Calizo, chairman sa Komite sa Public Order, ang kahimtang sa mga K9 dogs diha sa ilang  nahimutangan sa Cagayan de Oro City Police Office (COCPO).

Kini ang unod sa special report ni Calizo sa sesyon sa konseho niadtong Lunes. Matod pa sa konsehal nga personal niyang nabisita ang mga K9 dogs sa ilang tangkal ug iyang nakita ang dili  maayong estado sa dapit labina nga labihan ka lapok sa panahon nga mabahaan ang dapit.

Sumala pa ni Calizo nga ang konseho una nang migahin og igong kantidad aron ipalit sa 7 ka K9 dogs aron magamit sa kapolisan sa pagmintinar sa kahusay ug kalinaw busan angayan sila nga maatiman pag-ayo.

Si Konsehal Calizo midugang nga dako kaayo  og  tabang  ang  maong mga K9 labina sa  kalihokan sa syudad hinungdan  nga siya nanghinaot nga  mahatagan sa dinaliang pagtagad ang kahimtang sa mga K9 dogs.