Calizo nahingawa nganong dili dungan pag-aprobar sa budget sa SK, Barangay

GIKAHINGAWA ni Konsehal   Romeo Calizo   nga  dili  dungan ang  pag-aprobar sa konseho  ang budget  sa Sangguniang Kabataan (SK) ug sa Barangay.

Sa sesyon sa konseho niadtong Lunes nga gidumala ni Bise Mayor Bebot Rodriguez, gipangutana ni Konsehal Calizo ngano nga dili dungan  ang  pag-aprobar sa  budget sa SK ug sa Barangay  ug unsay igong rason niini.

Matod ni Calizo nga kaniadtong anaa pa siya sa Armed Forces of the Philippines, dungan man ang pag-aprobar sa budget sa tanang units sa ahensya.

Sumala ni Bise Mayor Rodriguez nga lakip sa rason nganong dili dungan ang pag-aprob sa budget tungod kay dunay mga barangay nga langan nga mosumite sa mga rekisitos, samtang ang uban  sayo mosumite apan kolang ang gidusong  rekisitos.

Si Konsehal Calizo mipasabot nga  unta mapangitaan kini sa remedyo nga matabangan ang SK  sa kadagkoan sa ilang barangay ug magiyahan aron nga dili mabiyaan ug dungan kining makaduso sa ilang mga budget sa ingon dungan usab   kini nga  maaprobahan.