Calizo motuki sa hangyo sa Iponan Liners

TUKION sa tigom ugmang adlawa sa komite sa roads and traffic management ni Konsehal Romeo Calizo ang hangyo sa Centro Iponan Jeepney Operators and Drivers Transport Cooperative (CIJODA TransCo).

Ang kapunungan mihangyo nga mapabilin ang naandang ruta gikan sa Centro Iponan paingon sa merkado sa Cogon ug vice versa nga giingong maapektohan sa pagpatuman sa bag-ong traffic route plan.

Gibutyag nga ubos sa bag-ong plano ang mga pampasaherong jeep gikan sa Iponan taman lang sa merkado sa Carmen ug dili ma mahimong molahos sa Cogon.

Matod pa nga kun kini mapatuman, labing maapektohan ang mga sumasakay nga gikinahanglan nang mag-double ride kun mopaingon pa sa Cogon.

Ilang gitumbok nga maapektohan ang mga mag-uuma nga magdala sa ilang mga produkto paingon sa Cogon ug bisan ang mga gagmayng magpapatigayon nga adunay mga tindahan sa Divisoria mapugos usab nga mag-double ride.

Niini, si Calizo nagdapit sa mga representante sa buhatan sa administrador, Legal, LTO-10, RTA, Iponan ug CIJODA pagtambong sa tigom ugam sa alas 2 sa hapon dinha sa hawanan sa konseho aron paghatag og katin-awan ug solosyon sa maong hangyo.