Calizo misugyot sa RACU-10 pagpresentar sa kinatibuk-ang unod sa cybercrime law

GIDAPIT ni  Konsehal Romeo Calizo, chairman sa komite sa public order, ang mga expert nga personahe sa  Regional Anti Crime Unit,  ngadto sa iyang  komite aron pagpresentar sa  mga butang nga naglangkob sa cybercrime law aron  masabtan kini sa tanan.

Kini  human  si P/Col Casal Ali,  bag-ong hepe  sa   buhatan, mi-courtesy call sa konseho  atol sa sesyon   niadtong Lunes nga gidumala ni Bise Mayor Bebot Rodriguez.

Sumala sa konsehal nga daghan siyang gusto ipangutana sa maong ahensya ug kon unsa nay ilang nabuhat, tungod kay daghan ang dili masabtan niini, labina nga  ila nang gipang-deputize ang mga barangay ug posible nga aduna silay kalisod sa pagpasabot mahitungod sa  cybercrime law labina gayud sa  pag-enforsar sa Online Sexual Abuse and Exploitation of Children (OSAEC).

Mipasabot si Konsehal Calizo nga gusto niya nga  masabtan ug mapasabot  kini atubangan  sa mga  sakop sa komite kon unsay mga naglangkob sa maong balaod aron nga mahiusahan  sa tanan  ang pagpatuman niini ug maprotektahan ang kabataan batok sa online sexual abuse.