Calizo mihangyo sa minibus, PUJ drivers, operators pagtamod sa matag ruta

GISUGYOT ni Konsehal Romeo Calizo, chairman sa komite sa Public Utilities, Energy and Transportation, nga kinahanglang adunay ma-amendar sa ordinansa sa dakbayan aron walay mapihig nga mga drivers ug operator.

Kini ang panahum sa konsehal atol sa tigom sa komite sa milabayng semana human gituki ang hangyo sa mga drivers ug operator sa syudad nga mapatuman na ang Local Public Transport Route Plan (LPTRP) sa syudad.

Gustong masayran sa mga PUJ drivers ang tukmang ruta nga gitugot sa Land Transportation and Franchising Regulatory Board (LTFRB) ngadto sa DONSALS tungod kay nakaapekto kini sa ilang kinitaan sa pagpamasahero.

Niini, si LTFRB Director Aminoden Guro mibutyag nga dili mahimong mopasakay ang mga DONSALS mini bus og pasahero sa sentrong bahin sa syudad kay gidili kini sa balaod hinuon gitugotan kining makapamasahero sa terminal to terminal nga ruta.

Nunot niini, gihangyo ni Calizo ang tanang transport sector nga motuman sa unsa ang nahilatid sa balaod aron walay mapihig samtang wala pa mapatuman sa hingpit ang LPTRP kay gipaabot pa ang memorandum circular nga mapirmahan sa mga kadagkuan sa DOTR.