Calizo midayeg sa daling aksyon sa RTA

GIDAYEG sa Komite sa Public Utilities, ubos ni Konsehal Romeo Calizo, atol sa tigom niadtong Biernes ang Roads and Traffic Administration (RTA) sa daling pag-aksyon sa mulo nga gipaabot  ni Konsehal Abbu sa miaging session sa konseho.

Kini may kalabutan sa giingong mga motorela nga ga-alley diha mismo sa tunga tunga nga bahin sa Gaisano Mall ug Gaisano City ingon man sa dalang Roxas nga maoy hinungdan sa labihan nga kahuot nga dagan sa trapiko sa maong dapit.

Sumala sa taga RTA nga ila na kining  giaksyonan, gani gipabutangan dayun nila kinig enforcer aron magbantay sa mga ga-alley sa nahisgutang dapit, butang gidayeg sa komite.

Hinoon, si Konsehal Calizo mikompirmar nga sa duha ka higayon nga siya nakaagi sa maong dapit iyang nakita nga miluag na ang dagan trapiko apan iyang gisugyot nga unta iapil usab ang ubang mga dapit sa syudad nga sagad adunay mga gapataka lang og alley nga mga motorelas.