Calizo gitugyan ang pagdesisyon ngadto sa TWG

GITUGYAN ni Konsehal Romeo Calizo, Chairman sa Komite sa Public Utilities, ang pagdesisyon ngadto sa Task Force nga gimugna pinaagi sa order ehikutibo ang sulat sa general manager sa JE Hydro and Bio Energy Corporation nga naghangyo maamendar ang Resolution No. 14401-2022 nga nagpadayag sa walay pagsupak sa laraw pagsupply og tubig sa pipila ka mga barangay ning syudad.

Kini ang unod sa special report sa konsehal sa sesyon sa konseho niadtong Martes nga gidumala ni Bise Mayor Bebot Rodriguez.

Sa maong sulat, giingon nga gilaraw usab sa korporasyon nga palapdan ang ilang water distribution ngadto sa Carmen, Canitoan, Pagatpat, Iponan, Bulua, Patag ug kasikbit pang mga barangay tungod kay sa kasamtangan mao lamang apil sa ilang mahimong masuplayan sa tubig segun sa unang giaprobahang resolusyon ang Lumbia, Pagalungan, San Simon, Baikingon, Indahag Camaman-an.

Matod sa konsehal nga sa gipahigayong initial nga panagtigom nga anaa ang presensya sa Rio Verde kinsa mao diay ang tinubdan sa tubig sa korporasyon, nasuta nga aduna dakong deperensya sa water rates sa JE Hydro kompara sa ubang mga water distributors hinungdan nga sa kasamtangan wala pa makaluwat og desisyon ang komite alang sa maong katuyoan.

Hinoon gipasabot ni Konsehal Calizo nga aron malikayan ang bangi sa desisyon tali sa gimugna nga adhoc committee ug sa  task force, iyang gisugyot nga didto kini iduso sa task force kinsa naninguha karon  nga mahatagan kasulbaran ang problema sa panubig sa syudad.