Calizo gitudlong SP rep sa MisOr/CDO Port Maritime/Mgmt Advisory Council

SI Konsehal Romeo Calizo ang gitudlo nga representante sa konseho sa syudad ngadto sa Misamis Oriental/Cagayan de Oro Port and Maritime Management Advisory Council (PMMAC).

Kini human hiniusang gipasaka sa konseho sa sesyon niadtong Lunes nga gidumala ni Bise Mayor Bebot Rodriguez ang resolosyon nga nagtudlo sa konsehal kinsa maoy kasamtangang chairman sa komite sa public utilities sa ika-20 nga Konseho sa dakbayan sa Cagayan de Oro.

Ang PMMAC usa ka pundok nga gilangkoban sa lain laing ahensya sa gobyerno sa panguna sa Maritime Industry Authority (Marina) nga gitahasan sa pagtuon ug pag-umol sa mga palisiya ug giya nga makatabang sa operasyon sa pantalan.

Niini, malaumon si Calizo nga ang iyang representasyon ngadto sa PMMAC magdala og dugang panagtambayayong tali sa mga nasudnong ahensya ug lokal nga kagamhanan alang sa pagkab-ot sa dugang kaarangan dili lang sa dakbayan kun dili lakip na sa probinsya sa Misamis Oriental ug kasikbit nga mga probinsya.

Ang resolosyon nga gipasaka sa konseho alang sa maong katuyuan gipaluyohan sa komite sa public utilities ni Calizo ug komite sa pamalaod ni Konsehal Ian Mark Nacaya. (SP/JNortiza/Photos by JBDacer)