Calizo dismayado sa mga quarry operators nga gamina

NADISMAYA si Konsehal Romeo Calizo, Chairman sa Komite sa Public Utilities (Roads & Traffic Management), sa iyang nakita sa reyalidad nga dunay mga quarry operators nga gihimo lang pasumangil ang pagkuha sa balas ug grabas apan diay gapahigayon usab sila og pagmina.

Kini ang reaksyon sa konsehal atol sa sesyon sa Konseho niadtong Lunes nga gidumala ni Bise Mayor Bebot Rodriguez sa special report ni Konsehal Roger Abaday nga misugyot pagsagop og resolusyon nga maghangyo sa City Mining and Regulatory Board (CMRB) paghatag og 5 ka tuig nga moratorium sa pag-isyug permit sa mga bag-ong aplikante.

Gipasabot ni Konsehal Calizo nga adunay uban nga dili lang gamina dihas suba apan gamina usab sa kabukiran pinaagi sa pagpasirit og tubig nga makaguba sa kinaiyahan.

Niini, gihangyo ni Konsehal Calizo nga, kon mahimo, ipatuman alang sa tanang matang sa mining ug quarry operations diha sa Iponan River ang gisugyot nga moratorium.