Cabula Lumbia Landless Assn naakredit isip LSB sa CDO

NAAKREDIT na isip usa sa mga Local Special Bodies (LSB) sa dakbayan sa Cagayan de Oro ang Cabula Lumbia Landless Association sa barangay Lumbia.

Kini human ang konseho sa syudad sa sesyon niadtong Martes nga gidumala ni Presiding Officer Protempore Konsehal Romeo Calizo, misagop sa resolosyon nga nag-akredit sa kapunungan subay sa DILG Memorandum Circular No. 2019-72 ug Article XIII sa lagda ug reglamento sa 1991 Local Government Code.

Nasayran nga nakaduso na usab ang kapunungan sa mga gikinahanglang rekisitos alang sa maong katuyoan. Isip sakop sa LSB ang kapunongan mahimong makapangayo og pundo sa kagamhanan ug ubang ahensya sa gobyerno aron magamit dinha sa pagpatuman sa ilang mga programa ug proyekto nga gilantawng maghatag kalamboan sa ilang mga membro.

Ang resolusyon nga gisagop sa konseho alang sa maong katuyoan gipaluyohan sa komite sa Planning, Research and Innovation ni Konsehal Ian Mark Nacaya ug komite sa pamalaod ni Konsehal Edgar Cabanlas.