Cabaring misugyot pagrepaso sa 10-year cave management plan

“DILI ko supak kay nagkinahanglan ta og kalamboan ilabina ang dakbayan sa Cagayan de Oro nga isa sa naila sa natad sa turismo”.

Kini ang reaksyon ni Konsehal Roberto Cabaring, Chairman sa Komite sa Cultural Communities, human gipresentar sa buhatan sa Provincial Environment and Natural Resources-Misamis Oriental-DENR, ang ilang sugyot nga 10-year cave management plan alang sa Buntod, Bolutohan, and Calabera Caves ug ang pagsagop sa mga plano sa lokal nga kagamhanan sa dakbayan sa Cagayan de Oro.

Ang presentasyon gihimo atol sa sesyon sa Lunes nga gidumala ni Bise Mayor Bebot Rodriguez.

Gitumbok sa konsehal nga ang Indigenous People's Rights Act of 1997 (INPRA) nga naila isip Republic Act No. 8371, usa ka balaod nga nag-ila ug nagprotektar sa katungod sa mga lumad ug sa ilang kultura.

Niini, hugot nga gisugyot ni Cabaring sa pagrepaso sa maong 10-year cave management Plan sa tinguha nga maprotektahan ilabina ang mga katungod sa lumad nga nakaposisyon diha sa nasangpit nga mga langub.

Ang maong sugyot giduso ni Bise Mayor Bebot Rodriguez ngadto sa Komite sa Turismo ni Konsehal Jay Pascual ug Komite sa Environment ni Konsehal Roger Abaday alang sa tukmang aksyon ug rekomendasyon.