Cabaring mipahalipay sa mga tinun-ang lumad

“ANG atong kabataan sa lumad maoy lig-on nga bahandi nga angayan suportahan aron sa umaabot nga panahon sila mahimong mga maayong lider.”

Kini ang makapadasig nga mga pulong ni Konsehal Roberto Cabaring, Chairman sa Komite sa Cultural Communities, atol sa programang ‘Ang Pagtatapos’, usa ka selebrasyon sa Philippine Army Finance Center Producer Integrated Cooperative (PAFCPIC) alang sa Higaonon scholars.

Dugtong sa konsehal nga dakong garbo kanilang mga lumad nga adunay unom ka mga tinun-an nga nakalampos sa ilang pag-eskwela human nakapahimulos sa 1st Batch-Community Based College Scholarship program sa PAFCPIC.

Dako ang pagpasalamat sa konsehal sa maong kooperatiba kay nahatagan og talagsaong kahigayonan ang mga lumad nga makakab-ot og dakong kalamboan dili lamang sa ilang kinabuhi kundi lakip na sa ilang komunidad. 

Niini mainitong mipahalipay si Konsehal Cabaring nila ni Adrian Magay, Orland Jun Sucongan ug Venjo Sucongan, BS Criminology diha sa Capitol University; Wendy Tumapon- BS Hospitality Management ug Jayvee Dagunlay-BS Criminology sa PHINMA-COC samtang si Engel Aculan-Bachelor of Elementary Education diha sa Liceo de Cagayan University.

Nanghinaut si Cabaring nga ang ilang naangkong edukasyon mahimong maayong ehemplo ug modelo sa ubang mga lumad aron sa ingon makahuman gyud sa ilang pagtungha.