Cabanlas padayong mitunol ug ayuda ngadto sa mga kabus

SI Konsehal Edgar Cabanlas, chairman sa komite sa Urban and Rural Poor and Housing Development, padayon nga nag-apod -apod ug hinabang sa katawhan sa syudad nunot niining nasinating pandemya.

Niining bag-o upat ka mga barangay sa syudad ang natunolan sa hinabang pinaagi sa pagpang hatag og mga food packs ngadto sa ubos nga hut-ong sa katilingban nga labaw’ng nanginahanglan sa ayuda.

Sumala ni Cabanlas nga ang kabus nga mga molopyo sa Barangay Bugo, Nazareth, Macasandig ug Indahag ang nakapahimulos sa maong ayuda.

Si Cabanlas mibutyag nga bisan sa ginagmay apan kinasing-kasing ang pagtabang ug paghatag pahalipay sa mga kabus sa tinguha nga makahatag kaarangan sa ilang kinabuhi ning kalisod nga ilang giatubang.

Subay niini nanghinaot si Cabanlas ug nag-ampo sa labaw’ng makagagahum nga bisan sa kapit-os nga giantos karon tungod pandemya magpabilin gihapon ang panaghiusa ug kooperasyon sa tanan ilabina diha sa pagsunod kanunay sa panawagan sa gobyerno sa pagtuman sa minimum health protocol aron makalikay ang tanan sa Covid-19.