Cabanlas naninguha nga mabalhin ang City Hall

Damgo ug tinguha ni Konsehal Edgar Cabanlas, chairman sa komite sa subdivision and landed estate, nga mabalhin ang City Hall ngadto sa dapit nga hamugaway ug konbenyente sa katawhan.

Kini ang unod sa special report sa konsehal atol sa sesyon sa konseho niadtong Lunes nga gidumala ni Bise Mayor Jocelyn Bebot Rodriguez.

Matod ni Cabanlas nga unta matukod ang bag-ong City Hall diin anaa nahisakop ang tanang opisina sa gobyerno lokal nga matawag nga one-stop shop ug adunay insaktong parking area nga dili mahasol ang mga kliyente.

Sumala niya nga paspas kaayo ang pag-usbong sa syudad maong angayan nang pangitaan sa pamaagi nga mabalhin ang City Hall sa usa ka dako nga dapit aron mapasayon ang mga transaksyon sa mga kliyente kay sa kasamtangan, adunay opisina nga nahimutang sa lain dapit.

Gani, gitinguha na ang pagbalhin sa City Hall niadtong ikaduha pa niya nga termino pagka-opisyal sa syudad human namatikdan ang paspas nga pagsaka sa ekonomiya.

Nunot, niini malaumon si Cabanlas nga unta matun-an kini tungod ug alang sa kaayuhan sa katawhan ug kaugmaran sa syudad.

Niini, giduso ni Bise Mayor Rodriguez ngadto sa komite sa ways and means ni Konsehal George Goking, komite sa planning, research and innovation and people’s organization ni Konsehal Ian Mark Nacaya, komite sa engineering ubos ni Konsehal John Michael Seno ug komite sa subdivision ni Cabanlas ang maong sugyot alang sa makuting pagtuon ug rekomendasyon.