Cabanlas naninguha matabangan mga molopyo sa Tablon seaside area

GITINGUHA ni Konsehal Edgar Cabanlas, Chairman sa Komite sa Urban and Rural Poor and Housing Development, nga matabangan ang mga residente sa Purok-12 seaside area sa barangay Tablon nga mapalit sa kagamhanang lokal ang loteng ilang kasamtangan giukopahan.

Sa milabayng tigom sa komite, gipasabot ni Cabanlas sa molopyo nga andam motabang ang syudad kun magahum ang panginahanglan sa katawhan ilabina sa programa sa pabahay nga usa sa mga prayoridad ug gitutokan nga programa ni Mayor Klarex Uy.

Niini, iyang gitahasan ang opisina sa City Housing and Urban Development Department (CHUDD) nga tun-an pag-ayo ang hangyo sa molopyo ug dapiton sa sunod tigom ang kadagkuan sa National Commission for Indigenous People (NCIP) aron makaabag ug makatabang sa panginahanglan.

Nasayran nga mokabat sa 248 ka pamilya ang nanimuyo sa maong dapit ug mihangyo nga mapabilin sa dapit tungod kay duol na sa ilang kapanginabuhian ug tunghaan sa ilang mga anak.