Cabanlas naninguha masolosyonan mulo sa ANCOP H’owners Assn

Gitinguha ni Konsehal Edgar Cabanlas, chairman sa komite sa Urban and Rural Poor and Housing Development, nga masolosyonan ang problema sa mga sakop sa ANCOP Homeowners Association sa Pasil, Kauswagan kalabot sa road right of way.

Kini human nasuta, atol sa milabayng tigom sa komite, nga ang gihangyong luna nga gamitong road right of way gipanag-iyahan sa pribadong indibidwal ug segun sa mga molopyo nagdumili kini paghatag sa panugot nga gamitong dalan ang iyang lote.

Niini, gitahasan ni Cabanlas ang Task Force Emancipation of Piso-Piso Beneficiaries ubos ni Engr. Armen Cuenca paghimo og survey sa dapit aron matino ang unod sa problema dala ang panghinaot nga mapangitaan kini sa tukmang solosyon.

Si Cabanlas naghatag sa task force og duha ka semana pagsumite sa ilang rekomendasyon ngadto sa komite.