Cabanlas nangusog sa kapaseguroan sa mga molopyo kilid sa mga suba

GUSTO lang masiguro ni Konsehal Edgar Cabanlas, chairman sa komite sa Urban and Rural Poor and Housing Development, nga luwas ug adunay proteksyon ang katawhan nga nanimuyo daplin sa suba panahon kun moabot ang katalagman sama sa pagbaha ug masiguro nga wala kini makasulod sa gitawag nga danger zone.

Kini ang pahimangnu ug pagpasabot ni Cabanlas atol sa tigom sa komite sa milabayng adlaw human gihangyo sa mga residente sa Bigaan River diha sa Barangay Gusa nga dili lang sila ipapahawa ug magpabalin lang sila sa dapit tungod kay duol lang ang ilang kapanginabuhian.

Hinuon, nasuta human sa gipahigayong pagsusi sa mga kawani sa City Engineering Office nga dili maigo ug maapektuhan ang kasamtangang giokupahan sa mga molopyo sa gitrabahong proyekto nga dike sa gobyerno.

Si Cabanlas dugang mipahinumdom sa mga residente nga kinahanglang maminaw kanunay sa panawagan sa gobyerno ilabina panahon kun adunay mga katalagman samtang padayon pa ang pagtrabaho sa proyekto.

Niini, ang mga molopyo sa dapit mipasalamat sa komite nga natubag ug nahatagan sa pagtagad ang ilang hangyo.