Cabanlas nangusog matunol ngadto sa ubang benepisaryo napasagdang socialized housing units

NASUBO si Konsehal Edgar Cabanlas, chairman sa komite sa urban and rural poor and housing development, nga adunay mga housing units ubos sa Socialized Housing Program sa dakbayan nga napasagdan ug wala maokupahi sa mga benepisaryo.

Kini ang unod sa iyang special report atol sa sesyon sa Konseho niadtong Lunes nga gidumala ni Bise Mayor Kikang Uy.

Matod niya nga mokabat sa 1,100 ka housing units ang wala pa okupahi sa mga benepisaryo sulod na sa dugay nga panahon.

Sumala ni Cabanlas nga sa paningkamot sa administrasyon moabot na sa 10 mil kapin ka mga socialized housing units ang nahuman sa lokal nga kagamhanan sa dakbayan apan daghan pang mga kabus nga nagkinahanglan sa desenteng mga pinuy-anan ug makapahimulos sa programa.

Niini, nangusog si Cabanlas nga makansela ang award ngadto sa mga wala nag-okupar sa mga housing units sa dugay na nga panahon aron mahatag sa ubang mga benepisaryo kay sa gidaghanon nga wala maokupahe halos usa ka barangay na nga walay mga balay ang makapahimulos niini.

Si Cabanlas miduso sa sugyot ordinansa nga magkansela sa mga award sa housing units nga wala mahatagi sa pagtagad aron mahatag ngadto nagkinahanglang mga kabus nga molopyo sa dakbayan.