Cabanlas nangusog matabangan Gusa farmers’ assn

GIHINGUSGAN ni Konsehal Edgar Cabanlas, Chairman sa Komite sa Urban and Rural Poor and Housing Development, nga matubag ang hangyo sa Senior Santo Niño Farmers Association Incorporated (SSNFAI) sa Barangay Gusa nga maangkon ang loteng kasamtangang giukopahan.

Si Cabanlas mipasabot nga nasayod siya sa tukmang kahimtang sa mga mag-uuma tungod kay nahimo siyang usa sa mga abogado niadtong panahon nga adunay problema ang maong dapit.

Hinuon, iyang gibutyag nga nagkasinabot na ang duha ka panig gikan sa kapunungan ug pamilyang Capistrano ug usa ka Memorandum of Agreement (MOA) ang nalagdaan niadtong tuig 1995.

Nunot niini, gitahasan ni Konsehal Cabanlas ang kadagkoan sa Task Force Emancipation nga makig-koordinar sa konseho sa Barangay Gusa aron marepaso ang mga gikinahanglang dokumento samtang iyang gihangyo si Konsehal James Judith II nga mahimong emisaryo sa duha ka panig aron mahan-ay ug mapadali ang pagproseso sa pagbalhin sa titulo sa lote.