Cabanlas nangusog masusi giingong pagpamaligyasa housing units dihas Xavier Ecoville sa Lumbia

GITAHASAN ni Konsehal Edgar Cabanlas, chairman sa komite sa Urban and Rural Poor and Housing Development, ang opisina sa City Housing and Urban Development Department (CHUDD) ni Atty. Joeffrey Namalata nga mohimo og makuting imbestigasyon sa gi-ingong pagpamaligya sa pipila ka housing units diha sa Xavier Ecoville Resettlement sa barangay Lumbia.

Kini human gipresentar ni barangay kagawad Yol Torralba atol sa tigom sa komite ang mga dokumento nga nagpamatood nga adunay nahitabong binayrana ug pinirmaha tali sa benepisiaryo nga biktima sa bagyong Sendong ug sa nakapalit sa lote nga mobalor og P45mil.

Gani, matod pa, adunay gipa-dangat nga reklamo ang mga opisyal sa kapunungan sa maong subdivision ngadto sa barangay kabahin sa maong problema.

Niini, si Cabanlas mipasabot sa tanang mga benepisiaryo sa housing program sa gobyerno nga gidili ang pagbaligya sa mga units ug gitataw niini nga pwedeng mapasaka-an og kaso ug mahimo pang mabutang sa black list sa gobyerno.

Ang opisina sa CHUDD gihatagan og duha ka semana sa pagsumite sa ilang rekomendasyon ngadto sa komite.