Cabanlas nangusog marelokar na mga pamilyang apektado sa Bolonsiri cemetery redev’t project

SI Konsehal Edgar Cabanlas, chairman sa komite sa Urban Poor, misugyot nga matugutan ang mga pamilyang apektado sa Bolonsiri Cemetery redevelopment project pagtukod sa ilang mga panimalay nga dili makasunod sa desinyong gihan-ay sa City Housing & Urban Development Department (CHUDD).

Kini human nasayran sa konsehal nga usa sa mga hinungdan nga wala pay naugbok nga mga balay ang pipila sa mga benepisaryo dinha sa gitaganang relocation site sa sitio Pamalihi, barangay Pagatpat mao ang kamahal sa galastohon sa disenyo sa pagatukong edifisyo.

Unta tugotan lang kining mga benepisaryo nga makatukod sa ilang balay diha sa gihatag kanila nga kabalhinan aron maplastar na sila samtang nangita sa pamaagi nga matuman ang desinyo nga gilatid sa dakbayan, hangyo ni Cabanlas.

Matod niya nga ipatukod sila sa ilang balay nga gusto nila nga kutob lang sa ilang magahum sa pagtukod kay susama sa relocation site sa Calaanan nagsugod man kini sa mga barong barong nga balay ug karon nindot na kaayo ang mga balay tungod sa paningkamot nga moabot gyud ang panahon nga mo-asenso ang matag pamilya.

Nasayran nga mokabat sa 300 ka residente ang kinahanglang marelokar ug 26 palang ka mga pamilya ang anaa sa temporaryong napahimutang sa sitio Pamalihi.

Niini naglaum si Cabanlas nga pinaagi sa pagtinabangay ug kooperasyon makab-ot gayud ang tinguha nga kaarangan.