Cabanlas nangusog maplastar mga pamilya nga apektado sa road widening project

Gitinguha ni Konsehal Edgar Cabanlas, chairman sa komite sa urban/rural poor and housing development, nga maplastar matagaan o’ mapangitaan sa kabalhinan ang 11 ka pamilya diha sa barangay Balubal kansang mga panimalay maigo sa gipatumang proyekto pagpalapad sa dalan sa Department of Public Works and Highways (DPWH-10).

Sa milabayng tigom sa komite, ang representante sa DPWH nagpatabang sa komite nga mapangitaan sa paagi nga mabalhin ang maong mga pamilya tungod kay dili gayud sila mohawa sa kasamtangan niining nahimutangan.

Nasayran nga ang maong mga pamilya lakip sa maapektohan sa road widening sa Sayre Highway Bypass road gikan sa barangay Agusan paingon sa barangay Puerto.

Si Cabanlas mibutyag nga importante kaayo ang dalan hinungdan nga kinahanglang mapangitaan sa pamaagi nga mabalhin ang mga apektadong pamilya.

Hinuon, si Kapitan Ibud Melliza mibutyag nga dugay na kini nga problema og gani adunay mga molopyo sa barangay nga mihatag og 2 mil metros kwadrados nga lote aron mapuy-an sa maong pamilya apan tungod kay midaghan na sila dili na paigo sa loteng gidonar.

Niini, gihangyo ni Cabanlas ang City Housing and Urban Development Department sa pagpahigayon og socio economic profile ug pagtino sa problema sa mga molupyo sa dapit inabagan sa Task Force Emancipation ug DPWH.

Dili nato ni biyaan, tinabanga ta pagsulbad sa problema, pamahayag ni Konsehal Cabanlas.