Cabanlas nangusog mapatuman Oro socialized housing program

GITAHASAN ni Konsehal Edgar Cabanlas, Chairman sa Komite sa Urban and Rural Poor and Housing Development, ang kadagkoan sa City Housing and Urban Development Department (CHUDD) nga marepaso ang tanang benepisaryo sa housing program sa syudad aron masuta kun tinuod nga mga benepisaryo ang natunolan ug nakapahimulos sa programa.

Sa milabayng tigom sa komite, si Cabanlas miluwat sa maong hangyo human iyang nadawat ang taho nga adunay pipila ka mga nagpuyo sa mga natukod nga housing units nga dili tinuod nga benepisaryo. Buot sa konsehal nga maimbestigahan ang maong taho aron masayran kun aduna bay mga nagmaniubra niini kay wala kini mahisubay sa mga proseso nga gikinahanlan.

“Daghang katawhan sa syudad ang gustong makapahimulos sa maong programa apan prayoridad man nga matunolan kadtong mga nawad-an sa panimalay gumikan sa kalamidad, mga biktima sa demolisyon ug mga nanimuyo sa danger zones,” pasabot ni Cabanlas.

Niini, siya nanghinaot nga masabtan sa kadaghanan ang programa kay dili tanan magahom sa gobyerno. Dako iyang paglaum nga mahatagan sa igong pagtagad sa kadagkoan sa CHUDD ang hangyo ug mahatag ang tukmang aksyon ug rekomendasyon ngadto sa komite.