Cabanlas nangusog mahataga’g kapasiguroan mga molopyo sa bakilid nga dapit sa Balubal

Gusto lang masiguro ni Konsehal Edgar Cabanlas, chairman sa komite sa Urban and Rural Poor and Housing Development, nga luwas ang katawhang nanimuyo sa bakilid nga mga bahin ilabina panahon sa kalamidad.

Niini, iyang gipasusi ang nahimutangan sa Greenfield Homeowners Association sa Purok 2, barangay Balubal aron masiguro nga wala kini makasulod sa gitawag nga danger zone.

Si Cabanlas mibutyag nga tinguha sa komite nga matabangan ang mulo sa nagkadaiyang kapunungan ilabina nga ang tumong alang sa kaayuhan sa kinabag-ang katawhan apan kinahanlang ang tanan ipaagi sa insaktong proceso.

Sa milabayng tigom sa komite, gisumite sa opisina sa CLENRO, City Engineers Office ug uban pang ahensya sa gobyerno ang gihimong area inspection ug base sa namatikdan ug rekomendasyon ang maong dapit dili angayang pagatukuran sa mga residential building tungod kay delikado sa pagdahili sa yuta.

Nunot niini, malaumon si Cabanlas nga masabtan sa mga molopyo sa dapit nga dili gayud matuman ang ilang hangyo tungod kay ang gihimo sa gobyerno alang man sa kaayuhan ug kaluwasan sa mga molopyo.