Cabanlas nangusog mabutanga’g road studs o cat’s eye ang nat’l hi-way

SA tinguha nga malikayan ang disgrasya sa kadalanan, si Konsehal Edgar Cabanlas nangusog nga mabutangan og road studs o’ cat’s eye ang mga national highway dinhi sa syudad. Kini ang unod sa special report ni Cabanlas atol sa sesyon sa konseho niadtong lunes nga gidumala ni Bise Mayor Bebot Rodriguez.

Gibutyag ni Cabanlas ang iyang namatikdan dinha sa national highway nga walay mga road studs sa tunga sa dalan. Gitumbok niini ang dalan gikan sa syudad paingon sa Manolo Fortich, Bukidnon; CM Recto Avenue paingon sa Laguindingan Airport; Masterson Avenue paingon sa Lumbia, ug dalan Velez, Vamenta paingon sa barangay Patag. Matod niya nga delikado alang sa mga motorista ug pasahero ang pagbiyahe ilabina panahon sa ting-ulan ug pag-abot sa kagabhion tungod kay dili na maklaro ang dalan kay nangapanas na ang pintal sa linya rason nga daghan ang madisgrasya.

Nunot niini, gisugyot ni Cabanlas nga kun magtrabaho og proyekto sa kadalanan ang Department of Public Works and Highways (DPWH) ug City Engineer’s Office, kinahanglan nga ilang butangan sa road studs o’ cat’s eye alang sa kapaseguroan sa mga motorista ug malikayan ang aksidente sa kadalanan.

Ang sugyot ni Cabanlas giduso ni Bise Mayor Bebot Rodriguez ngadto sa komite sa Public Works ni Konsehal john Michael Seno alang sa dugang pagtuon ug rekomendasyon.