Cabanlas nangusog maangkon sa taga-V. Castro St loteng giukopahan

SI Konsehal Edgar Cabanlas, chairman sa komite sa urban and rural poor and housing development, nangusog nga makapahimulos ang mga molopyo sa V. Castro Homeowners Association Inc. sa 20% acquisition program sa kagamhanang lokal.

Kini human nasayran sa konsehal atol sa milabayng tigom sa komite nga andam ang tag-iya nga mobaligya sa iyang lote ug nagkasabot na sa presyo ang mga molopyo ug ang tag-iya sa lote.

Apan, matod pa, dili tanan magahum sa mga residente hinungdan nga mihangyo sila og ayudang pinansyal aron ibayad sa tag-iya sa loteng ilang giokupahan.

Niini, gisugyot ni Cabanlas nga mo-avail sa programa sa gobyerno ang kapunungan kay nagpadayon man ang kagamhanan sa paghatag og prayoridad sa mga proyekto nga magdala og kaarangan sa kinabuhi sa mga kabus ilabina kadtong mga walay insakto ug permanenteng pinuy-anan.