Cabanlas nanawagan sa mga opisyal sa brgy nga magmakalmahon

Nanawagan si Konsehal Edgar Cabanlas, chairman sa Komite sa Ethics and Blue Ribbon, sa tanang mga opisyal sa barangay sa syudad nga ipatigbabaw kanunay ang professionalism dinha sa mga lantugi sa isyu panahon sa sesyon aron malikayan ang kagubot nga mosangpot sa panag-away.

Kini alayon sa nahitabong panagbangi nila ni Kapitan Ritchie Tinampay ug Kagawad Henry Dacer sa Barangay Puntod atol sa gipahigayong sesyon sa konseho sa barangay sa milabayng adlaw.

Hinoon, si Cabanlas miingon nga normal lamang ang panagbangi sa hisgutanan tungod kay lain lain man ang baruganan ug prinsipyo ug gani, motaas man ang mga tingog bisan diha sa konseho ug kongreso apan kinahanlan nga malikayan ang paghinagitay nga moresulta sa panag-away.

Niini, malaumon si Cabanlas nga ang panagbingkil nga nahitabo sa konseho sa barangay Puntod masulbad ra sa ilang level ug dili na moabot sa pagsinumbongay.

Iyang gihangyo ang mga opisyal sa barangay dinhi sa dakbayan nga magmakalmahon ilabina niining nagkadool nga piliay sa barangay aron walay puas nga matunol ang serbisyo ngadto sa katawhan.