Cabanlas nagtoong isolated case ang mga nahitabong krimen

Dako ang pagtoo ni Konsehal Edgar Cabanlas, Chairman sa Komite sa Urban and Rural Poor and Housing Development, nga isolated case lamang ang nahitabong pagpanulis sa usa ka pawnshop dinhi sa syudad.

Kini ang gipaambit nga reaksyon ni Cabanlas sa special report ni Konsehal Yvy Emano kalabot sa tukmang kahimtang sa kahusay ug kalinaw sa dakbayan.

Matud niya nga normal kana sa dagkong syudad sama sa ubang mga dapit sa Pilipinas ug gani lakip ang ubang mga nasud adunay mga krimen nga gakahitabo. “Ang importante nga dili kita mahadlok ug magmaluya ug ipadayon nato ang atong mga tahas sa pagserbisyo sa katawhan,” panawagan sa konsehal.

Niini, iyang gidugang nga prayoridad ni Mayor Klarex Uy ang pagmintinar sa kahusay ug kalinaw sa syudad ug dayag niana ang iyang pagtunol sa mga sakyanan ngadto sa tanang Police Stations aron magamit dinha sa pagpatrolya.

Giaghat sa konsehal ang tanan nga magtinabanga aron maangkon ang kalampusan sa pagsumpo sa krimen ug mapakgang ang mga daotang elemento nga adunay tinguha pagguba sa kahusay ug kalinaw sa syudad.