Cabanlas nagpahimangno nga magmabinantayon sa bagyo

HUGOT nga nanawagan ug nagpahinumdom sa katawhan sa dakbayan si Konsehal Edgar Cabanlas, chairman sa komite sa Urban and Rural Poor and Housing Development, nga mag-amping niining bagyo nga mohapak sa nasud nga diin labing apektado niini ang pulo sa Mindanao.

Kini ang unod sa special report ni Konsehal Cabanlas atol sa sesyon niadtong Lunes nga gidumala ni Bise Mayor Kikang Uy.

Sumala ni Cabanlas nga angayan na nga mangandam na daan ang atong mga nagkadaiyang ahensya sa goberno pinaagi sa sayo nga pagpahibalo sa katawhan kabahin niini nga bagyo aron dili na subling mahitabo sama sa bagyong Sendong nga diin mikalas sa liboan ka kinabuhi nga ato na usab handumon ang ika-10 ka tuig karong December 16 ning tuig, sumpay ni Cabanlas.

Nunot niini, gihangyo ni konsehal Cabanlas ang mga kawani sa City Disaster Risk Reduction Management Department (CDRRMD), City Engineering Office, Philippine National Police (PNP), Department of Public Works and Highway (DPWH), CEPALCO, COWD, mga opisyales sa barangay ug uban pa nga magpreparar ug mangandam na daan sa ilang mga plano alang niining umaabot nga bagyo.